20220116牧者的話

牧者的話—惡的膚淺                                    翁子良

「我冇份欺凌佢㗎，我forward其他人哋恰佢嘅片之嘛」

「人人都係咁，我都係照做啫，有咩問題？」

「唔關我事㗎，上頭叫到，我都冇計。」

以上都係喺今時今日，各個年紀層，各個階段嘅人，都唔會陌生嘅句式。當我哋講緊以上句式嘅時候，有一點好值得我哋去反思，就係「究竟我哋做緊嘅嘢，係唔係錯嘅呢？」

有一位作家，佢係二戰後納粹大屠殺嘅倖存者，佢叫漢娜・鄂蘭(或譯:漢娜·阿倫特)，神學背景出身嘅佢，同時係一位政治理論家、哲學家。鄂蘭於戰後被派往法庭聽審，其後為審訊作紀錄、評論，而佢當時聽審嘅，就係一個將數以百萬生命送去集中營嘅前納粹軍官嘅案件。

一個手染數百萬人鮮血嘅官，不難想像，佢係一個殘暴、無知、無學識、心理唔平衡嘅人。但對聽審嘅鄂蘭嚟講，最震撼佢嘅，就係佢發現呢個官，不但只唔係殘暴嘅兇徒，佢甚至得到多位精神科醫生判斷佢嘅心理、精神狀態都係正常，佢甚至有一個健康嘅家庭。到底係乜嘢，令到一個正常人能夠做出一個如此殘暴不仁嘅決定呢？呢個成為咗鄂蘭聽審後不斷纏擾住佢嘅一個問題。及後，佢建基於呢個事件，整理出一篇影響後世深遠嘅文章，《艾希曼在耶路撒冷：對惡之膚淺的報道》，當中提及到一個重要概念，「惡嘅膚淺」。

「惡嘅膚淺」，膚淺一詞並唔係講呢份「惡」冇咩影響力，並唔係描述呢份「惡」嘅力度。對於嗰個納粹軍官嚟講，佢做嘅一切其實都好「合理」：我只係好好工作；我只係偱規蹈矩完成上司俾我嘅命令；我只係努力工作維護好我嘅家庭……佢做嘅一切，都只係覺得「我唔知」、「我睇唔到」、「唔關我事」、「我唔清楚」、「我只係想返工」。正正係呢樣嘢，令鄂蘭分析出「惡」對人嘅影響。

第一，「我唔清楚」—— 惡令人喪失思考嘅能力

人之為人，就係因為人會思考、反思，有如法國哲學家笛卡爾所講嘅名句「我思故我在」。當一個行動經過思考，呢個行動先會成為佢生命嘅一部份，就好似大大小小嘅砌圖咁，組成為自己作為一個人嘅一部份。呢一點我哋唔難理解，試諗諗，我哋記憶中最深刻嘅，往往係一啲自己認真思考過而促成嘅經歷，就好比我哋唔會記得今朝用咗幾多克嘅牙膏刷牙，行咗幾多步先返到教會。而「惡」，就係令到人做一切嘅行動，都唔再思考，亦唔會為到自己做過嘅事再反思。呢個人嘅生命，並冇任何嘅砌圖組成，只係空虛地不斷重覆。

第二，「唔關我事」—— 惡令人喪失同理別人嘅能力

人之為人，無論你幾內歛、幾獨立，都總能夠同他人連結。但「惡」令自己呢種同人連結嘅力量消失，唔再能夠體現到他人嘅感受，世界彷彿只有「我」、「我」、「我」。佢哋行動唔需要再諗對其他人造成咩影響。

篇幅所限，恕未能有更深入嘅分享。但單以上述對「惡嘅膚淺」嘅扼要，我哋不難發現呢種「惡嘅膚淺」喺我哋嘅身邊不斷出現。制度、官僚、職場、校園……分別在於，我哋喺當中，係能夠思考、分辨嘅一個；定係成為「罪惡鏈」當中嘅其中一環，默默地成就罪。可能你仍會問：「咁我身在其位，可以點啫？」

面對大環境嘅極端壓力，我哋可點做呢？鄂蘭有咁嘅睇法：

「就算我哋反抗唔到任何嘢，或者一切反抗都注定失敗；但我哋仍有一個自由，就係選擇不去參與」。唔參與唔等於躺平，唔參與係為到保持自己內心嘅判斷；保持自己內心嘅判斷，就能保持對他人觀點嘅連結，保持思考，保持自己生之為人嘅一份價值。

互勉之。